Literary: Dear Santa

Sa pagdatal ng Paskong kinasasabikan

Bata’t matanda’y may kahilingan

Sari-saring mg abagay na kailangan

Ay! Lubhang kay dami kung pakinggan

Turo sa mga bata’y isulat sa papel

Lahat ng ibig na sa Pasko’y matanggap:

Laruan, damit, sapatos, kendi’t kahel

At ilagay sa medyas nang may paglingap

Kahit matatanda ba’y pagbibigyan ni Santa?

Gayong may uban na’t animo’y halamang lanta

Bakit di subukan gayong wala namang masama

Bakit mahihiya kay Santang mahusay makisama

Sabihin kay Santa ang nais makamtan

Kahoy, yero’t pako nang may masilungan

Walis na panlinis, lumang damit sa katawan

Bigas, noodles at sardinas sa tiyang walang laman

Kung kakayanin pa ni Santa na tugunan

Hanapbuhay na pagkakakitaa’t masasandalan

Bagong pamayanang di binabaha kapag umuulan

At gobyernong di ningas-kugon sa nangangailangan

ECH