Literary: Sa Belen

Anong hiwaga ang nakita

Sa munting sabsabang aba

Bakit mga pastol ay masaya

Pati mga anghel ay maligaya

Ama, ina’t sanggol sa kuwadra

Payapang larawan ng pamilya

Tahanan ma’y marungis at sira

Huwaran sila’t mabuting giya

Mundo’y nakatunghay sa belen

Doon isinilang Hari ng sanlibutan

Sa lamig ng gabi’y kinumutan

Ng inang higit pa ang ganda kay Helen

Sa dukhang belen lahat ay pantay

Pantas, hari, pastol maging pilay

Pagkat sanggol doong sumilay

Sa taong nilikha’y Siyang aakay

Halina mga katoto sa Kanya’y dumalaw

Ang Daan ang Katotohanan at ang Buhay

Sa belen ay sambahin ang dakilang Tanglaw

Sa sandaigdiga’y magpapalayang tunay

- ECH