Literary: Bakit Kailangang Ituloy ang Pasko

Huwag kang magkubli sa masangsang

na dahilan upang di ka magdiwang

sa Paskong laging hinihintay

Huwag mong idahilan na wala ka

kahit isang kusing; walang pagkain

at prutas sa mesa; walang bagong

damit; walang parol, belen at krismas

tri; walang pangregalo; walang wala

kahit bula

Wala man ang lahat ng bagay, tuloy

pa rin ang Pasko. Ang Berbong nagkatawang

tao ang pinakamagandang dahilan upang

ituloy ang pagdiriwang ng Pasko. Siya

lang at wala ng iba pa.

Tuloy ang pasko sa kabila ng lahat mong

paulit-ulit na daing at iling. Tantuin

mong sa Kanyang pagdating, dala Niya’y

pag-ibig at pag-asang sa buhay mo’y

magdudulot ng tuwang walang kahambing.

EMI