PARI… PARE

(Para sa mga paring naliligaw ng landas sa TAON ng mga PARI)

Ikaw ay tinawag na pari

Alagad ni Kristong Hari

Yaman mo’y malinis na puri

Kaloobang busilak ay ibang uri

Tagapag-akay sa tamang landas

Tagapayong nagbibigay ng lunas

Tagapayapa ng kaluluwang nag-aaklas

Tagapamagitan ng yumaong nagkawas

Presensya mo’y kailangan sa daigdig

Ipakita si Kristo sa sangkatauhang ligalig

Homilya mo’y tinig ng Diyos sa nakikinig

Pumapatid ng uhaw gaya ng malamig na tubig

Pagkahubad ng alba matapos ang misa

Lalabas ng simbahan, sa tao’y makikiisa

Pagbabagong-anyo’y nagaganap nang kusa

Ito ba’y magandang himala o isang parusa?

Ika’y paring tinatawag ngayong pare

Madalas sa pagtitipon ng mga pare

Kamunduha’y niyakap na parang tore

Nilimot ang panatang mabuhay na pobre

Tuwina’y lasing at pilit sa pananalangin

Walang alab sa pagmimisa’t mga gawain

Takbo ng isip ay malabo’t laging bugnutin

Hanap ay ligaya’t krus (ay) ayaw pasanin

Pagbabalatkayo’y ginawang isang libangan

Masayang umaakay ng parokyano sa kahibangan

Si Kristo’y ginagawang kasangkapan at tuntungan

Nang sariling layon ay maangkin sa kandungan

Anong angkop na pangalan ang babagay

Na marapat sa iyo’y itawag at ibigay?

Paring sugo’t kinatawan ng Diyos na buhay

O pareng binyagan sa alak at sumusuray?

By:ECH, Filed Filipino and Literary