NATUTULOG BA ANG DIYOS

Pinggan sa mesa’y walang laman

Palayok ay hangin ang palaman

Namimilipit na tiyan ay kumakalam

Ulirat ay windang, isip walang alam

Mga batang-kalye’y kay dami

Aborsyon ay uso sa nakararami

Pakikiapid inilalantad nang walang kimi

Pangungurakot niyayakap kahit marumi

Mga bulaang mangangaral ay nagsusulputan

Aral ni Kristo’y binabaluktot at pinapalitan

Salapi’t kapangyarihan ay dinidiyos ng sanlibutan

Budhi ng tao’y nalusaw kaya walang kinakatakutan

Mundo’y gulapay na sa hirap at dusa

Giyera, salot, sakit, sakuna’y parusa?

Tao’y tuliro’t naghahanap ng pag-asa

Sa droga, krimen at karahasan ay namimihasa

Pagkakanya-kanya ang batas ng buhay

Mamatay ang mahina, matira ang matibay

Mayaman ay binubuhay, dukha’y binibitay

Hustisya’y laruang sa putik sininsay

Sabi sa Bibliya, Diyos ay makapangyarihang lubos

Walang pangyayaring di Niya natatalos

Bakit tahimik Siya’t di kumikilos

Natutulog ba ang Dakilang Diyos?

By: ECH, Filed under Literary and Filipino